Madaxweyne Carbeed oo saxiixay in xukun dil ah lagu fuliyo 340 maxbuus

Madaxweynaha Ciraaq, Barham Saalex ayaa ansixiyay in dil toogasho ah lagu fuliyo in ka badan 340 maxaabiis ah oo lagu helay dambi ah inay argagixiso ahaayeen iyo dambiyo kale.

Faahfaahin lagama bixin kiisaskan balse xabsiyada Ciraaq waxaa ku xiran dad badan oo looga shakiyay inay ka tirsanaayeen ururka la magac baxay dowladda islaamka.

Dadka ka faalooda arrimaha Ciraaq ayaa sheegayaa in arrintan shaaca laga qaaday ee ku saabsan xukunka dilka ah ay walaac ka muujin doonaan dadka u ololeeyo xuquuqul insaanka.

Waxay sheegayaan inay soo badatay in la jirdilo maxaabiista si ay u qiraan dambiyada lagu soo eedeeyay isla markaana maxkamadeyntooda lagu deg dego.

Ciraaq ayaa ka mid ah dalalka caalamka ee ay faraha kulul ku hayaan kooxaha loo yaqaan argagaxisada oo dalkaas ka geystay weeraro iyo dagaalo uu dhiig badan ku daatay.